Moadde mánu dás ovdal almmhuvvui Maxida Märake goalmmat studioskearru ”Anekdot”, su vuosttaš skearru viđa jahkái.

Son muitala SVT Sápmái ahte skearru lea bures váldojuvvon vuostá ja ahte dát lea iežálágán go ovddit skearrut.

Háliidin dahkat juoidá iežá, háliidan muitalit muitalusaid. Sulastahttá luođi vaikko lea hip-hop ja rap, muhto visot lávllut lea gásttašuvvon dego luođit, son dadjá ja joatka:

– Mon háliidin ráhkadit sámi skearru mii ovddasta dan fiidna Sámis. Ii dárbbaš álo leahkit seavdnjat, lossat ja politihkalaš. Dat šadda goitge politihkalaš, háliidin ráhkadait feastaskearru mas lea historiija ja cuvccat.

Báddejuvvui Sámis

Skearru báddejuvvui Sámis ja Märak bovdii buvttadeaddjiid iežas lusa vai skearru šadda su mielaid mielde.

–Lei olu bargu dáinna skerruin. Mon bargen buvttadeaddjiiguin geat eai leat Sámis eret. Stuora oassi skearrobuvttadeamis lei ahte sii bohte mu lusa, deaivvadedje olbmuiguin ja besse leat dan máilmmis vai ipmirdisgoahte maid mii galggaime ráhkadit.

Mannan vahkus leai Maxida Märak girjemeassus Göteborggas ja doppe son ságastii giela, dáistaleamiid ja luođi birra sámi ártisttaiguin Amocin ja Áilu Vállen.

– Dat lei hirbmat miellagiddevaš, mii golmmas leat Sámis eret muhto mii bargat musiihkan iešguđet ládje. Lei miellagiddevaš čalmmustahttit ahte mis leat sierra sajádagat. Amoc ja Áilu Válle oidnoba eanemustá Sámis ja mon ovddastan Sámi olggobeal Sámi ja dan mon lean dahkan dehálaš oassin iežan karrieras, son dadjá.