Vuovdečuollamat Ohedahke čearus lea garrasit digáštallojuvvon. Dál leat Birasjusisttat ja Fridays for future maid seahkánan dasa ja leat ilmmuhan SCA Geavaheaddjidoaimmahahkii ja RO:i. Sii oaivvilidt ahte SCA márkanfievrrideapmi lea boastut, ahte boaldit muorrapelletse dagahivčče ahte dálkkádatrievdadeamit unnole.
– Márkanfievrridanriekti dadjá ahte jus fitnodat oaivvilda ahte sin buvtta lea buorre lundui de ferte dat duođaštuvvot luohtevaš dieđalaš duođaštusain, dadjá Birasjuristtaid Ida Edling.
Son joatká:
-Dieđalašvuohta lea hui čielggas dainna ahte stuorimus áitta dálkkádahkii, biologalaš girjáivuhtii ja sámi rivttiide lea go vuovdefitnodat njeaidá ollu vuvddiid.
SVT Sápmi lea ohcan SCA ságaide, muhto cuoŋománu 4. beaivvi vástidit sii e-poasta bakto:
”Go mii eat lea oaidnán ilmmuhusa de mii eat sáhte vástidit dasa maidege”.
”Ii sáhte isoleret bvttadeamis”
Göran Englund lea ekologiijaprofessor Ubmi universiteahtas ja son oaivvilda ahte ii sáhte isoleret buktaga nuoskideami buvttadeamis.
– Ii pellets boađe jus ii njeaidde vuovddi. Jus galgá vearadidit dálkkádatváikkuhusaid de ferte juohke buvtta máksit dálkkádatgoluid go njeaidá vuvddiid, dadjá son.
Son oaivvilda jus galgá veardidit makkár dálkkádatváikkuhusat njeaidimis leat de ferte maid geahččat makkár váikkuhusat nuppástuhtti meahccedoalus lea čitnadioksiida luoitimii.
-Vuovdehuhttindoallu addá deatálaš buktagiid maid mii dárbbašit dál ja boahtte áiggis, muhto sáhtálii máksit iežas birasgoluid iežá ládje go maid dál dahká.
Duopmu sáhttá buktit rievdadusaid
Jus fitnodat dubmehalla Geavaheaddjidoaimmahaga ja Máinnustanáittardeaddji ilmmohusas de soaitá fitnodat fertet rievdadit iežas márkanfievrrideami.
– Biraslihkadus ja guoskevaš čearut geahččalit juohke ládje bissehit dan stuora vuovdebillisteami, dadjá Ida Edling.
SVT Sápmi joatká ohcat SCA ságaide.