Čoahkkin oasseváldiid mielas lei dát buorre čoahkkin ja leat ovdánan áššis. Dál áigu ráđđehus jođáneappot gávdnat gaskaboddosaš čovdosiid, mat álkidahtte Fovsen orohaga boazodoalu ja áigut guhkit áiggi čovdosiid guorahallat.

– Mii árvvoštallat buot čovdosiid, dadjá Terje Aasland preassadeaivvadeami maŋŋá, ja son deattuha ahte doaivu ahte ášši čovdojuvvo, nu ahte boazodoallu ja bieggafápmorusttegat sáhtášit leat seamma sajis.  

Sandra Borch lohká ahte dát lea “čielga olmmošvuoigatvuođa rihkkun”.  

– Mii váldit vuhtii go moaitet min áššemeannudeapmi maŋŋá go duopmu celkojuvvui, dadjá son.  

Aasland ii leat miehtan ahte dát lea olmmošvuoigatvuođa rihkkun. Son cealká ahte lea olmmošvuoigatvuođa rihkkun jos sii eai daga áššái maidege. Aasland dadjá ahte boazodoallu galgá seailut dán guovllus ja maŋisboahtti buolvvaide joatkašuvvat. Son lea atnon ándagassii Fovsen boazodoalliin ja doaivu eanet čoahkkimiid singuin ja Sámedikkiin, dál go áššit leat ovdáneamen. 

– Nuorat leat čađahan garra miellačájehemiid maŋimuš beivviid. Dat lea imaš go dákkár garra vugiiguin ferte fuomášahttit norgga servodaga, dadjá Sámedikki presideanta Silje Karine Muotka. 

Son joatká: 

– Deháleamos lea ságastit boazodoalu boahtte áiggi dárbbuid birra, vai dat seilošii.