Syöldate gielddas leat ođđa bieggafápmoplánat guđá guvlui gosa áigot hukset bieggamilluid.
Golbma dain váikkuha Västra Kikkejaure boazodollui, ja sátnejođiheaddji oaidna negativvalaš váikkuhusaid jus plánat ollašuvvojit.
”Eai soaitte sáhttit geavahit johtingeainnu”
– Earret eará lea sáhka johtingeainnus. Dan eat soaitte sáhttit geavahit ja jáhkkimis lea ahte mii eat sáhte geavahit guovllu gosa áigot hukset go dat lea guovdu čearu eatnamiid. Šadda váttis geavahit dákkar eatnamiid, dadja Jonas Stenberg.
Čearru ii leat beassan oasálastit plánemii ja lea hui ártet ahte gielda sáhttá válljet guovllu ja de gávdent fitnodaga mii háliida hukset.
– Ja de gielda guođđá ášši ja čearru šadda de dáistalit guokte ášši oktanaga, dadja Stenberg.
Sivván dasa ahte gielda ráhkada ođđá plána lea ahte dat ovddit ii dohkkehan go vissis allodaga bieggamilluin. Leai maiddai ahte dien ovddit plánas ledje válljen guovlluid main ledje stuora váikkuhusat jus fitnodagat álggahivčče doaimmaid doppe.
Ráđđedallat gullevaš čearuiguin
Angelica Eklund, servodatstratega Syöldate gielddas dáhkida ahte čearut besset buktit sin oainnu áššis.
– Mii leat bovden buot čearuid Syöldate gielddas. Lea bargu mii bistá ráđđedallanáiggi, dadjá son.
Bieggafápmoplána galga leat válmmas loahpageažis 2025.
Maiddai guovllu eanaeaiggádat moitet sihke plána ja bieggafápmofitnodaga Fu-Gena bargovugiid. Geahča filmma.