Loahpageazis mannan vahkus rahppui ođđa sámi čájáhus ”Rávdnji – sámi luottat Romssa guovllus” Norgga árktalaš universiteahtamuseas Romssas.

Čájáhus šadda oassi dálá čájáhusas ”Sámi kultuvra” mii lea leamašan museas 1973 rájis.

– Vel otne leat oallugat geat eai dieđe dan báikkalaš historjjá ja dat lea min bargu lasihit máhtu, dadjá Ingrid Sommerseth, arkeologa ja čájáhusa kuráhtor preassadieđáhusas.

”Háliidit boktit beroštumi”

Čájáhusas beassa oaidnit ahte sápmelaččat leat leamašan Romssa guovllus máŋggaid duhat jagiid. Das gulla maid muitalusaid mearrasámi kultuvra birra, kultuvrralaš čanastagat mearragátti ja siseatnama gaskas. Muitalit maid olu daid báikkiid birra masá bággojohtimat leat čuohcan garrasit.

– Romssa sámiid bággojohtin muitala historjjálaš vearrivuođa birra mii bistá vel otná beaivai. Sihke boazodoaluguovllut ja kulturmuittut leat áitojuvvon bieggamillorusttegiin ja sisabáhkkemiin, dadjá professor Trude Fonneland ja joatka:

– Gáibiduvvo eanet dutkan dan báikkalaš sámi historjjá birra. Dáinna čájáhusan mii háliidit boktit beroštumi sámi historjjá birra Romssa guovllus ja lasihit máhtu. Eanemustá mii sávvat ahte nuorat šaddet diehtoáŋgirat dan báikkalaš sámi kultuvrra birra, son dadjá.