Mii deaivat Joan Carlinga Medborgarviesus Stockholmmas, olmmošvuoigatvuođaáktivista Filippinnas guhte lea rahčan eamiálbmotrivttiid ovddas badje 30 jagi. Son lea dáppe Stocholmmas Right Livelihood Awarda dihte.
-Mon doaivvun ahte dát bálkášupmi lasiha fuomášumi eamiálbmotjearaldagaide máilmmiviidosaččat ja eareliiggánit dál máilmmiviidosaš roasus gos eamiálbmogat galggale leat guovddážis go dahket mearrádusaid, dadja Carling.
Earret eará lea Carling leamaš Asia Indigenous People's Pact (AIPP) váldočálli, bistevaš mielláhttu ON:a eamiálbmotforumis ja dorjon áŋggirdeamiid ruvke- ja čáhcefápmoprošeavttaid vuostá eamiálbmotguovlluin. Son háliida muitalit iežas čeavlámus bottus, iežas mielas goit.
-Go mon bargen AIPP:ain, de mii álggaheimme ártihkkalráiddu Her Story, čálmmostahttit emaiálbmotnissoiniid barggu ja cuiget dan mávssolaš rievdadusbarggu mii dahkko guovllu olbmuin.
”Deaŧálaš ahte mii bargat ovttas”
Earret eará ledje Ylva Gustafsson ja Inger Axiö, Stockholmma sámesearvvis ja Eva Forsgren, Ámnesty Sámis, maid doppe Medborgarviesus- muitaleame iežase vásáhusain ja hupmat máilmmiviidosaš ovttasbargguin.
-Lea hui deaŧálaš ahte mii bargat ovttas eamiálbmotorgánisašuvvnaiguin ja olmmošvuoigatvuođaorgánisašuvvnaiguin nannendihte min iežame rolla, dadja Inger Axiö.
Ylva Gustafsson lasiha:
-Lea hui somá go lea fas okta eamiálbmot guhte ožžo dán bálkášumi ja ahte Joan ožžo guhte guhká lea rahčan aktivisttan ja politihkalaš dásis máŋŋáid jagiid.
Bálkášupmi geigejuvvui gaskavateahkeda Cirkusis Stockholmmas.