Cealkámušas Sámeráđđi deattuha suru go vašši ja rasisma sámi álbmogii lea lassánan, maŋemus rally olis.

”Rasisma ja vašši sápmelaččaide ii leat dohkálaš. Servvodat ferte álgit váldit ovddasvástádusa, mánáideamet, báikegoddámet ja min oktasaš beroštumiid dihte ”, sii čállet.

Viidásit čállet ahte sii garrasit moitet vearredaguid ja vaši mat čuožžilit riidduid dihte ja go vuosehuvvo ahte lágat mat galget suddjet sápmelaččaid ja eamiálbmogiid eai adnojuvvo seamma ládje go iežá joavkkuid suddjemis. Oaivvildit ahte addá vearru gova, sápmelaččaid eallimis ja vuoigatvuođain lea unnit árvu.

Gáibiduvvo dárkilis guorahallan
Cealkámušas gáibidit ahte eiseváldit váldet dán duođalažžan, vearredagut ja vašši sápmelaččaid vuostá galget guorahallojuvvot dárkilit ja vearredahkkit šaddet váldit ovddasvástádusa.

Ávžžuhit maiddái media váldit ovddasvástádusa go čállet dákkár áššiid.

”Go medias levvet stereotiippalaš govvideamit ja polariserejuvvon muitalusat, dat nanne vaši ja rasismma”, sii čállet.

Máŋga bellodaga bukte cealkámušaid
Dievasčoahkkimis mii lei Sjädtavaellies bukte maiddái Guovssonásti, Sámiid Riikkaidbellodat ja Min Geaidnu oktasaš cealkámuša mas garrasit moitet Ruoŧa Rally Upmis go eai váldán vuhtii boazodoalu.

Maiddái Landspartiet svenska samer ja Vuovdegat bukte oktasaš cealkámuša man bokte gáibidit ahte poliissat jođánit galget dutkat bohccuid mat gottáhalle olggobealde Upmi.

Goappaš cealkámušain leat ávžžuhusat sihke ráđđehussii ja iežá eiseváldiide váldit ovddasvástádusa.