Ruoŧa girku meahccceguorahallamis, mii diibma almmohuvvui, ledje logemar evttohusa movt girku meahccedoallu earret eará galga vuhtiiváldit eamiálbmoga. Evttohus lea ahte vuođđojurdda friddja ja dieđihuvvon mieđiheapmi, Fpic, galga váldit atnui ovttasráđi čearuiguin.
Dál go Julevu bismagoddi leat vástidan gulaskuddamii de háliidit sihkkut Fpic guorahallamis.
”Jáhkehahttiváttisvuođat”
Ulrika Karlsson, Himmel och Jord girkopolitihkkar guhte guhka lea bargan áššiin, moaitá dán sakka.
– Jus soabadanproseassas dadjet ahte galget gieđahallat eamiálbmotrievtti ja de hilgot evttohusa ahte eamiálbmotriekti galga leat mielde girku njuolggádusain de gal leat jáhkehahttiváttisvuođat, dadjá son.
Háliida ahte galga gustot buot sápmelaččaid
Dás ii leat sáhka mearrádusas oaivvilda Julevu bismagotti bisma Åsa Nyström.
-Mii háliidit ahte eamiálbmotriekti galga čállojuvvot girkoortnegii, muhto ii sátnádit dan nu movt guorahallan evttuha, dadjá son.
Son joatká:
-Mii oaivvildit ahte dáinna evttohuvvon sátnádagain šattale čearut dušše eamiálbmotovddasteaddjit ja dat sáhttá nannet dan joavkojuohkima maid Ruoŧa girku lea ovdanbuktan iežas andagasátnumis sápmelaččain.