Árabut dán jagi vuittii ”In My Hand” dokumentárafilbma Tromsøpalmen go oaivvilduvvui buoremus oanehisfilbma Romssa Riikkaidgaskasaš Filbmafestiválas (Tromsø Internasjonale Filmfestival)
Niillas Somby historjá lea vuođđun dán filbmii. Son lea dovddus miehtá Sámi maŋŋel Álttá-miellačájehemiid. Son leai okta dain gávcci nuorain geat 1979:s nealgudedje iežaset Eidsvolls plassenis olggobealde stuoradikki Oslos.
Maŋŋel son dubmejuvvui go leai geahččalan bávkalit Fállejoga silddi vuosttildan dihte elfápmohuksema. Son čiehkadalai Kanadas ja garvvii iežas ráŋggáštusa guokte jagi ja dainna su máidno miehtá máilmmi. Bávkaleami oktavuođas son massii gieđas.
Dál son lea fas Kanadas, goit filmmas. Filbma galgá čájehuvvot Davvi-Amerihká stuorimus dokumentárafilbmariemuin ”Hot Docs Canadian International Documentary Festival”. Riemut lágiduvvojit juohke jagi Torontos ja leat cuoŋománu 24. beaivvis gitta miessemánu 4. beaivái.
– Moai letne nu ilolaččat ja rámis go munno filbma lea okta dain 113 filmmas mat leat válljejuvvon 2 662 filmmas, dadjá Marja Helander guhte lea ráhkadan filmma ovttas Liselotte Wajstedten, NRK Sámi jelgii.