Eatnama váibmu-čálli lea Rawdna Carita Eira, šuokŋadahkki lea Britta Byström ja bagádalli lea Elle Márjá Eira. Geahččit besset oaidnit ođđa visuálalaš dulkojumi sámi árbevierus.

– Lea rámálmas oažžut vejolašvuođa bagádallat vuosttaš sámi opera ná stuora ... , dadjá Elle Márjá Eira.

Son lávlu ja bargá bohccuiguin. Son lea filbmabagádalli ja girječálli Guovdageainnus eret ja lea earret iežá bagádallan ”Suoladeapmi”-filmma 2024.

– In leat goassege bargan operan, muhto lean beassan čuovvut iežá čájálmasa Stockholmmas ja dat ii leat nu stuora earru dan proseassas ja filbmaráhkadeamis.

Muitalus lea Ipmila birra, guhte luovva beaivvi, mánu, olbmuid, bohccuid ja luonddu. Beaivváš ožžo gukte bártniid, Njáveš ja Háčes. Soai ráhkistuvvaba Beaivvi niidii ja Mánu niidii. Muhto vieljjásguovtto riiddáskeaba ja dramáhtalaš dáhpáhusat dagahit várálaš váikkuhusaid dan beaivvi go Ipmil boahta ruovttoluotta.

– Mon dovddan oadjebasvuođa bagádallat dán, ereliiggánit dan dihte go lea sámi muitalus mas lea sámi čálli.

”Miellagiddevaš ja balddehahtti”

Teakstačálli Rawdna Carita Eira lea dramatihkar ja girječálli Norggas eret. Son lea earret iežá bargan dego dramatihkar Beaivváš Sámi Našunálateáhteris, Norggas. 2011 almmuhuvvui su vuosttaš girji – ”Ruohta muzetbeallji ruohta”-romána.

– Mon lean jurddašan mii sámi opera lea ja sáhttá leahkit, mon hal in leat goassege oaidnan dakkára. Šadda miellagiddevaš muhto dieđusge balddehahtti maid, dadjá Elle Márjá Eira.

Sus lea maid fárus eallilan šuokŋadahkki, Britta Byström, gean musihkka earret iežá BBC Symphony Orchestra, Gürzenich-orkeasttar, Detroit Symphony Orchestra ja Ruoŧa Radio Symfoniijaorkeasttar leat čuojahan.

– Mon dovddan friddjavuođa bagádallat dán iežan geahččanguovllus dan dihte go dat ii leat dahkkon ovdal muhto sámi muitalanárbevierru movttidahttá mu, dadjá Eira.

Operačájálmas soahpa sihke mánáide ja boarrásiidda. Vuosttaščájálmas lea Gonagaslaš Opera stuora lávddis Skábmamánu 15 beaivvi 2025.