Go SVT Sápmi almmuhii iežas neahttasiiddu 2021:s juovlamánus de eai lean nu alla vuordámušat.

SVT leai rehkenasttán unnibut go 10 000 lohkki vahkkui mii leai vuođđuduvvon ovdalaš sámi ođaslohkkiin. Dat leai maid alla mihttomearri go ruoŧabeal Sámis eai oro go 20 000-40 000 sápmelačča.

”Guhkkin olgolis Sámi”

Go čoahkkáigeassá 2024 de lea SVT Sámi ruovttusiiddus gaskamearálaččat eanet go 150 000 lohkki vahkus. Ja dat lea vuordemeahttun logut.

-Mii vuohttit ahte lea stuora beroštupmi sámi jearaldagaide olggobealde Sámis maid. Mii bargat guovtti mihttojoavkkuin, váldolohkkiin Sámis, muhto maid riikalohkkiin maidda mii fertet veahá eambbo čilget čállosiin ja voddiin, dadjá Linda Hermansson.

Čállosiin háliidit loktet sámegiela

Muhto bargu ii leat duššefal gávdnat lohkkiid. Doaimmahus lea maid dán jagi fokuseren buvttadit eanet materiálaid sámi gielaide.

Sámegiella oktoráđđe Tv-ođđasiin ja voddain SVT Sámis. Muhto dál bidjo eanet návccaid maid loktet sámegiela čállosiin. Dál gávdno vásedin siidu gos gávdná sámegiel artihkaliid ruovttosiiddus.

-Midjiide lea maid deaŧálaš ahte čállingiella oidno. Muhto lea hástalus gávdnat bargiid main lea sihke journalistaoahppu ja sámegiella. Mon jáhkán ahte human buot sámi media ovddas go dajan ahte mii dárbbašit eanet sámi journalisttaid geat hupmet ja čállet daid sámegielaid, dadjá Hermanssone.

Sámedikkeválggat guovddážis

2025:s leat miessemánu sámedikkeválggat guovddážis. Doaimmahus lea dál pláneme válgadigaštallamiid. Ja 15 minuvtta Sámi prográmmas leat moadde oasi guhkiduvvon válggaid dihte.

-Mon sávan ahte min válgagoziheapmi addá ollu dieđuid min váldogehččiide. Mii galgat sihke guorahallat dan politihka mii lea leamaš ja čilget maid dat sierra bellodagaid áigot boahtteáiggis, dadjá Linda Hermansson.