Son ii geavat aktivistasáni iežas birra.

– Mu oassi aktivismas lea cegget ovttastusaid, juohkit máhtu ja leahkit doppe gos mearrádusaid váldet, nuvt mon lean vissát juogaládje aktivista, son dadja.

Son berošta dálkádatáššiin ja dan nu gohčoduvvon ruoná molsašumis. Son oaidná dálkádatášši buot stuorimus roassun máilmmis dál, eareliiggánit eamiálbmogiida geaidda čuohcá garrasit.

– Go luondu váikkohuvvo de dat čuohcá midjiide, son dadja.

Son lea válljen beroštit dáin áššiin danin dát čuhcet suinne peršuvnnalaččat.

”Mii fertet bargagoahtit”

Dát čuohcá mu bearrašii, olbmáide ja mu álbmogii, muhto maid máilmmi eamiálbmogiidda. Mii fertet bargagoahtit nu ahte vuhtiiváldet min áššiid mearridanproseassain, muđui gal min badjelgehččet, son dadja.

Son leai diimá Osloves gos sáminuorat ovttas dálkádataktivistaiguin čajehedje iežase mielaid Norgga ráđđehusa vuosttá Fosenduomu dihte.

– Lea deahálaš deike boahtit ja čájehit ahte mii ruoŧabealde doarjut sin, son dalle dajai SVT Sápmái.

Árabut dán jagi bođii diehtu ahte davit Fosenjoavku ja ráđđehus leat soabadan ja dáistalus lea nohkan.

”Dan gal livččen dahkan”

Oallugat čađaheddje sivila jeagohisvuođa muhto Sara-Elvira oaidná dan čovdosin jus eai leat eara vejolašvuođat.

– Dan gal ii hálit dahkat, muhto dovdo ahte lea bággu. Mon jáhkán, vai dieđan ahte livččen dan dahkan jus oainnán ahte eai leat eara vejolašvuođat, son dadja.

Muhto Sara-Elvira dáistalus lea aitto álgán ja nuorra go son lea de lea son ollu juo geargan dahkat.

– Mon lean gávdnan bargovuogi mii heive muinne ja dat buot deaháleamos lea leahkit doppe gos mearridit, Sara- Elvira Kuhmunen dadja ja joatká:

– Mearrideaddjit dárbbašit min máhtu nuvt dat molsašupmi šaddá vuoiggalaš ja duođai ruoná.