Fredrik Proste girji ”Leŋges hearggi, Sáhčal fatnasa” lea nammaduvvon Davvi ráđi girjjálašvuođabálkášupmái.

Muhto son ii áiggo jorgalit girjji ruoŧagillii vai ieža eanetlogugielaide. Muhto son fertii dan jorgalit dubmengoddái.

– Kopiijaid mon boalddan, dadjá son SVT Sápmái.

Svenska Dagbladet áviisa árvvoštallet buot girjjiid mat leat nammaduvvon bálkášupmái ja mannán vahku álmmuhuvvui girjeárvvoštallan sihke ruoŧa- ja sámegillii.

– Go son ii hálit jorgalit girjji de fertiimet ohcat davvisámegielat árvvoštalli ja gávnnaime Ánne Wuolabe. Son evttuhii min almmuhit árvvoštallama maid sámegillii ja dat leai mu mielas hui somás evttohus. Mon válden oktavuođa iežan hoavddain ja son gal mieđihii dasa ja nu šattáige, muitala Josefin de Gregorio, SvD:a girjjálašvuođadoaimmaheaddji.

”Duššefal positivvalaš dávisteamit”

SvD ii leat goassege ovdal almmuhan sámegielat ártihkala.

– Mii duššefal álmmuhit ruoŧagillii muhto dagaime dán go dát lea nu áidnalunddot dáhpáhus erenoamaš dilálašvuođas ja buohkat liikojedje.

Makkar dávisteamit leat boahtán?

– Duššefal positivvalaš dávisteamit, lohkkit liikojedje ja dávvisámegielagiidda lea dát somá ja eahpedábálaš.

Leago dát juogá maid dahkabehtet boattevuođas?

– Gii dan diehtá, soaita dáhpáhuvvat go dát leai hui somá, dadjá Josefin de Gregorio.