Dát dáhpáhuvai go ledje johtimin dálveláiddomiidda moatte vahku áigi go Laara Gråik, ja son muitala ahte ii leat vásihan dán ovdal.
Maŋimuš áiggi lea muohttán hui ollu ja dat lea doadján čuohteneare beazi johtingárddis, gos bohccot ledje ija badjel.
– Mun hirpmástuvven, livčče sáhttán viehka funet geavvat. Mii gáttiimet ahte bohccot leat oadjebas dilis gárddis, lohká
Okta boazu jámii – máŋga roasmmohuvve
Gávdne ovtta jápmán bohcco ja ovtta mii lea beazi vuollái šaddan, muhto dat gal lei eallimin. Máŋga bohcco skirbmo. Boazu mii lei muora vuolde lea roasmmahuvvon ja dan leat dikšumin.
– Mii doaivut ahte ceavzá, dadjá Jinjevaerie sátnejođiheaddji Inger-Helene Gråik.
Eai goassege vásihan dán
Beazit mat doddjojedje ledje 20-30 sente gasu, SCA fitnodagas muitalit ahte dán gohčodit muohtadoajáhahkan. Dat lea hui hárve ahte ná ollu doddjojit oktaga. Muhto dat lea šaddan dábáleabbut go leat bivvalat dálvet, nugo 2021 dálvvi ja dál.
– Dat lea muohttán ollu njuoska muohttaga maŋimuš áiggiid beziid ala ja nu doddjojit čilge Ola Kårén, SCA`s.
Dát sáhttá leat várálaš olbmuide.
– Dákkár dilis lea hui váralaš leat vuovddis. Beazit sáhttet doddjot váikko goas.
Vuovdefitnodat: “Čearu ovddasvástádus”
Čearru válddi oktavuođa vuovdefitnodagain, ja ožžo lobi muhtun ráje beziin njeaidit amas ii šat dáhpáhuva dat seamma.
Livččiidet sáhttán eastadit dán?
– Juo, jos livčče jearran mis ovdal, de diehttelasat livččiimet addán lobi, muhto duođe eanet livčče sáhttán dahkat, lohká SCA bargi Ola Kårén .
Ja joatká:
– Dat leat min eana, muhto čearus lea geavahanvuoigatvuohta das. Dat jerre eanaoamasteaddjis lobi čuollat beziid gárddis. Muhto dat lea čearu ovddasvástádus váldit oktavuođa ja jearrat.