Filbmapreassa lei lyralaš maŋŋel go ”Biru Unjárga – Føkkings Nesseby” lei čájáhuvvon filbmafestiválas Torontos. Riikkaidgaskkásaš filbmaneahttasiidu Top Film govvidii earret iežá váldorollaneavttára Sarah Olaussen Eira barggu dego perfekšuvdna.
– Dat lei ártet oaidnit iežas šearpmas, muhto hui somá go ožžo buori responsa, dadjá Sarah Olaussen Eira NRK:ai.
Bagadalli Egil Pedersen dadjá ahte lei niehku mii šattai duohtan.
– Dat lea leamašan mu niehku dan rájes go álgen ráhkadit filmmaid ahte beassat soames dain vihtta stuora filbmafestiválaide. Ahte viimmat beassat, ja vel dan vuosttaš guhkes filmmain, dat lei áibbas erenomáš, son dadjá.
Bileahtat suolemasčájálmasaide leat nohkan
Mannán vahkkoloahpas lei suolemasčájálmas ruovttus go filbma čájáhuvvui Deanus ja Unjárggas. Dál vurdojuvvojit eambbo suolemasčájálmasat ovdal go boahta Norgga biográfaide čakčamánu loahpas.
Visot bileahtat suolemasčájálmasaide leat nohkan.
– Buot bileahtat nohke moatti diimmus, dat lei magihkalaš. Eat leat vásihan dan ovdal, dadjá Čáhcesuolu biográfahoavda, Beathe Harila.
”Máŋggas leat dihtoáŋgirat”
Filbma lea Elvira birra, guhte dovdá ahte ii riibba ruoktogilážis. Son sávvá oažžut oktavuođa iežas dánska áhčin – go su eadni šattai áhpeheapmi klinihkas Dánmárkkus. Muhto go deaiva áhčis de šadda dušše stuibmi.
Dat lea ožžon riikkaidgaskkasaš rámi muhto áŋkke lea ráhkáduvvon sámi nuoraide, dadjá Egil Pedersen.
– Dat lea dehálaš ahte doaibma buoremusaid dáppe. Mus lea jáhkku ráhkadit filmmaid vissis báikkiin ja sámi nuoraide. Dalle lea stuorit vejolašvuohta ollet olggobeal dán ulbmiljoavkku ja máilbmai, son dadjá.