Ruoŧa davimus gielda lea erenoamaš. Gironis ja Jielleváris lea Ruoŧa vuolimus bargguhisvuohta. Barggut maid duođas dárbbašivčče eai gávdno industriijas muhto almmolaš suorggis.
– Leat olu industriijabarggut, muhto seammás leat unnan bargit stuora oasis almmolaš doaimmahusas, dadjá Arne Müller.
Suomas lea ruvkevearru
Son cuiggoda ahte lea earru movt Ruoŧŧa ja iežá riikkat ávkkastallet luondduriggodagaid ja movt juhket diinesa. Suomas lea earret iežá ruvkevearru, Norggas lea čáhcevearru vai diines galgá mannat gielddaide.
Máiddai bieggafápmu meannuduvvo ieža ládje ránnjáriikkain.
– Min ránnjáriikkain lea vuogádat mii sihkkarastá diinesa gielddaide.
Ii buvtte barggu báikkalasaide
Arne Müller oaidna ahte barggut dávjá mannet iežá báikkiide go dohko gos doaimmahus lea.
– Máŋga dain bargguin maid ruvki otne buktá mannet Lulejui, Stockholmii vai vel guhkkelii máilmmis, dadjá Müller.