Unnitlogugielaidfestivala Váhčiris lágiduvvo dál guđat gearddi ja lea sturron dan rájes go álggahuvvui 2018.
Guokte beaivvi leat prográmmas dievva aktiviteahtat juohke unnitlogugielas juohke ulbmiljoavkkuide.
Áigot earret eará muitalit máidnasiid, doallat bargobájiid, almmuhit ođđá oahpponeavvuid, Epa-gilvu, konsearttat, logaldallamat ja paneladigaštallamat.
Julevsámi live-podda
Máiddái sámedikki giellaguovddáš lea doppe ja dárjot aktiviteahtaid buot ulbmiljoavkkuide.
– Bearjadaga mis leat giellaaktiviteahtat mánáide gos besset buđaldit. Mii áigut maid dieđihit min doaibmaga boahttevaš aktiviteahtaid, nu movt mentorprográmmat ja ahte sáhttá ohcat doarjaga giellaaktiviteahtaide, dadjá Sara Omma Simma, Giellaguovddáža ossodatjođiheaddji.
Bearjadaga lea maid Rudnalit live-podda julevsámegilli.
Logaldallan giellaváttisvuođaid birra
Lávvordaga bovdeba Giellaguovddáš ja Institutet för språk och folkminnen (Isof) olbmuid bohtit guldalit Jane Juuso logaldallama gos son muitala movt váldá iežas giela ruovttoluotta ja movt beassa eret giellaváttisvuođain. Maŋŋel dan lea paneladigaštallan dan fáttá birra.
Manin lea dehálaš ahte Giellaguovddáš lea doppe?
– Vuosttažin de lea somás ja fiinna festivala. Dat lea maid dehálaš giellaarena mas mii hálidit oasalasttit. Min bargu hal lea ovddidit ja nannet sámegiela, dadjá Sara Omma Simma.
Filbmačájáhus
Bearjadateahkeda lea dokumentara ”Vi är fortfarande här/Mii leat ain dás” vuosttaščájálmas Ruoŧas ja dat čájáhuvvo máiddái festivalas.
Filbma muitala čieža sámi dáiddariid birra geat sirde ávdin vissui Mázes 70-logus gos ulbmil lei ráhkadit dáidaga ovttas. Muhto go Áltá-ášši buollái de šadde vuostildieaddjit.