Oddajágemánus 2024:s sáddii Bihtáma gielda ohčamuša ja dál lea ráđđehus mearridan ahte Bihtám šaddá 27:et sámi hálddašangielda.

-Dál lea hui gehppes dovdu, dego halddašangieldan sáhttit mii dál loktet dan kollektiivvalaš máhtu ja dat lea hui miehtemielat ja somá, dadja Kata Nilsson (S), gielddaráđđi Bihtáma gielddas.

”Ruoktogiella ii oaččo šaddat negativvalaš sierrameannudeapmi”

Kata Nilsson oaivvilda ahte gielda lea juo ovdagihtii álgán ovttasráđđadallat ja humádit sámi ovddasteddjiiguin.

Áigot vuoruhit giellaohpahusa mánáide

-Go lea sáhka ruovttugielaoahpahusas de lea hui deatálaš ahte ii šatta negátivvalaš sierrameannudeapmi, ahte dát oahppit eai báze dábálaš oahpahusas dahje suohtas diibmmus. Die lea juoga mainna mii fertet bargat vai gávdnat čovdosa.

Kata Nilsson sávvá maid ahte gielda čájeha eanet dan sámevuođa dál.

-Mii dárbbašit obbalaččat dál čálmmostahttit ahte mii leat sámi hálddašangielda. Lea deaŧálaš čálmmostahttit giela sierraládje, ovdamearka dihte gálbet sámegillii, dadja son.

Hálddašangielddat

Ruoŧabeal Sámis gávdnojit 27 sámi hálddašangieldda. Dain gielddain lea dus ovdamearka dihte njuolggus oažžut ovdaskuvlla ja boarrasiiddivššu belohahkii dahje ollát sámegillii. Dus lea maid njuolggus geavahit sámegiela go humát gielddain dahje guovllu eiseválddiiguin.

Guoskevaš gielddat ožžot stáhtadoarjaga liigegoluide.