Son neaktá Maggana, nieiddaguovtto Ristina ja Áila eadni Snödrömmar nammasaš juovlakaleandaris.
– Dán jagi ii boađe muohta, ja sis lea stuora čierastanbáikkis fitnodat ja dat lea stuora váttisvuohta geahččalit dan čoavdit, dadja Anna Åsdell.
Olle Sarri neaktá Sörena, stuora gávpotássi ja son boahtá hotellii.
-Son ohca iežas ruohttasiid ja lea hui mánálaš ja gieris, son dadja.
”Hui somá oahpes dili beassat oaidnit”
Ii goassegeš ovdal lea sámi veahka leamaš juovlakaleandar guovddážis. Anna Åsdell jáhkká ahte mánát geat dán gehččet liikojit.
-Mon jurddašan ahte lea somá dán jagaš juovlakaleandaris, mii lea stuora dáhpahus, dovdat oahpes birrasa ja iežas duohtavuođa.
Son muitala ahte lea ođđaáigásaš veahka ja sápmelaččat bohtet dakkaviđe dovdat oahpes dili.
-In sáhte dadjat jus iežát oidnet sámivuođa dakkaviđe vai dađi mielde, son dadja.
”Lea leamaš váttis garvit muohttaga”
Mannán čavčča lea Snödrömmar báddejuvvon sierra báikkiin davvi Ruoŧas ja stuorimus váttisvuohta lea leamaš garvit muohttaga vai ii govain oidno.
Olle Sarri lea duđavaš dainna go leat lihkostuvvan ovttastahttit cuvcca, gealdda ja leaikka mii ii leat nu álki.
Juovlakaleandar lea prográmma mas lea stuora ja muhtomin hui gáibideaddji geahččit, muhto Olle Sarri ja Anna Åsdell eaba lea reakšuvnnaide ráhkkanan.
-Mon fal jáhkán ahte bohtet leahkit ollu reakšuvnnat kaleandara sisdoalus. Mon jáhkán maid ahte dás šadda ollu sáhka, dadja Sarri čiegusvuođalaččat.