Girku ándagassiiatnuma oktavuođas lea girku maid guorahallan iežas vuovdedoalu. Guorahallan lea buktan ovdan logenar dehálaš evttohusa girkostivrii, erret eará ahte go girku ávkkástalla iežas vuvddiid de galget váldit vuhtii čearuid dárbbuid.
Vai guorahallama evttohusat galget dohkkehuvvot de lea oaivilhábmen dehálaš, dan oaivvilda Göran Enander, Ruoŧa girku guorahalli.
– Vaikko gávdno evttohus de dat ii mearkkaš ahte gávdno mearradus, dat lea dehálaš ahte sámit ja sámi orgánisašuvnnat váldet vuhtii ja vástidit gulaskuddamii. Mon jáhkán ahte lea dehálaš ahte čearuin lea seammásullásaš oaidnu dáin áššiin, son muitala mannán vahku 15 minuvtta Sámis-prográmmas.
Gulaskuddan lea álggahuvvon
Guorahallan lea sáddejuvvon gulaskuddamii ja gulaskuddanáigi lea gitta guovvamánu 25 beaivvi rádjai boahtte jagi. Guorahallama evttohusat galggaše de bidjat doibmii ođđajagimánus 2026.
Earret girku iežas instánssat leat Sámediggi, Sámiid Riikkasearvi, Boazoeaiggádiid searvi ja Sáminuorra ožžon dieđu ahte sis lea vejolašvuohta buktit oaiviliid sisdollui. Ovttaskas olbmot besset maiddái oaiviliid buktit.
Anja Fjellgren Walkeapää, boazoeaiggát ja jägmeasttir, jáhkká ahte olgomáilbmi váldá buoragit vuostá guorahallama.
– Muhto jáhkán ahte šaddá váttis siskkobealde girku go leat nu olu ođđa lávkkit ja jurddašanvuogit mat eai gávdno ruoŧa vuovdedoalus otne, son dadjá.
Fertejit álgit boahtte jagi
Maŋŋel guovvamánu 25 beaivvi galgá girkostivra váldit mearrádusa evttohusaid birra ja rievdadusat girkuortnegis mearriduvvojit girkočoahkkimis.
– Dat lea dehálaš ahte girku bivda ándágassi sápmelaččain, boahtte árvvoštallan dahkko 2026, de fertejit álgit boahtte jagi. Lea nanu morálalaš geatnegasvuohta girkus ja dat lea okta dain nannoseamos ákkain ahte dát duođain čađahuvvo, dadjá Göran Enander.
Olles prográmma ”Kyrkan och skogen” sáhttá geahččat vaikko goas SVT Playas.