Dutkit leat dán váhku dieđihan ahte 2024 lea dat buot lieggaseamus jahki mii lea mihtiduvvon dan rajis go leat álgán mihtidit temperatuvrraid. Ja liegga dálkkit Ruoŧas dagahit eahpesihkkaris muohtadili go eai leat ovdalaš jahkeáiggit ja dálvi boahta goas fal.
-Dál leat jahkegaskatemperatuvrrat davvi Ruoŧas measta badjel nolla gráda ja dat dagaha váttisvuođaid, dadja Pererik Åberg, SVT:a dálkediehtti.
”Álot ballu”
Sanna Vannar lea boazovázzi Sirges čearus ja eahpesihkkaris dálvedilli vádduda su barggu.
-Olbmos lea álot ballu go ii dieđe movt šadda. Vahku dás ovdal gis arvvii ja ledje lieggaceahkit nuvt dálvi ii leat vel boahtán albmaládje. Fertejit leat heahtteplánat, muhto lea hui váttis einnostit.
Go leat dávjá njázut de šadda geardni ja ealliin lea váttis beassat bodnái bibmu.
Vannar lea šaddan biebmat iežas ealu daid dálvvid go lea leamaš heajos guohtun. Son oaivvilda ahte boazu ii beasa bodnái molsašuddi dálkkiid dihte.
-Mannan dálvvi arvvii ja šattái cuoŋu. Dan in lea vásihan guovvamánu loahpas ja njukččamánu alggus.
Guokte ceahki lieggasit
Ruoŧŧa lea measta guokte ceahki lieggasit go ovdaindustriala áiggi ja davvi Ruoŧta lieggana jođanit. Dutkit einnostit ahte árktalaš guovllut liegganit measta njeallje gearddi jođaneappot go eara sajis máilmmis.
–Moatti jagis ii oainne dálkadatrievdadeamiid danin go dálkkit leat álot leamaš molsašuddi. Muhto jus geahččá 30 jagi maŋŋos de leat stuora rievdadusat, dadja Pererik Åberg ja joatká: Vaikko dáikkádat rievdá de leat muhtin beaivvit dego ovdal, muhto de gis leat beaivvit mat eai lean 50-60 jagi dás ovdal, eai nu lieggasat ja iige nu ollu muohta. Muhto dat beaivvit bohtet ja bohtet dávjjibut.
Boahtte ráidooasis dálkkádatrievdadeamiin Sámis de mii muitalit go bohccot eai guođe duoddara go johtingeainnut leat jikŋon.