Sioux-álbmot gohčoda dan ”Čáhppes gearpmaš”.
Oljojođas mii manná guovdu sin eatnama Standing Rockas North Dakotas.
Dan rájis go oljofitnodat Energy Transfer lea ohcan lobi hukset oljojohtasa Dakota Access Pipeline 2014 lea dat boktán vuosttildeamiid. 2016:s vuosttildedje badjel logiduhat olbmo doppe.
Maiddai sámi ovddasteaddjit sihke Ruoŧas ja Norggas ledje Standing Rockas doarjume eamiálbmot miellačájehemiid. Máŋggat orgánisašuvvnat maid dorjo, earret eará Greenpeace USA.
Máŋŋel miellačájehemiid de bissehii Barack Obama gaskaboddosaččat huksema. Muhto moadde mánu máŋŋel go Donald Trump šattai presideanta de jotke oljojohtasiin.
Veahás maŋŋel stevdnii Energy Transfer sihke Greenpeace ja máŋga eamiálbotmiellačájeheddjiid. Oljofitnodat oaivvilda ahte Greenpeace lea lágidan miellačájehemiid. Sii dadjet maid ahte leat massán máŋga čuođi miljuvnna ruvnna go Greenpeace lea juohkán boasttu dieđuid sis.
Sihtet golbma miljárdda ruvnna
Fitnodat sihttá golbma miljárdda ruvnna. Dál gieđahalla North Dakota duopmostuollu jus ášši galga diggái boahtte jagi. Jus nu fal šadda de ferte Greenpeace heaittihit doaimmas Amerihkás, dadjet orgánisašuvnnas.
– Dát sáhttá áitit Greenpeace Amerihkás ja dan doaimma mii lea leamaš jođus badjel 50-jagi, dálkkadaga, birrasa ja olmmošvuoigatvuođaid ovddas, dadja Rolf Lindahl, áŋgirdanjođiheaddji dálkkádagas, energiijas ja ruđalaš fuolaheamis Greenpeace Rouŧas.
”Buohkat dihtet movt diet álggii”
Sámedikkeáirras Beaskka Niillas lea okta dain vidánuppelot sámi ovddasteddjiin mat oasálaste miellačájehemiin Standing Rockas.
Sii geat čuvvo miellačájehemiid dihtet movt dat álggii. Ledje baikkálaš návččát mat ásahedje miellačájehemiid ja Greenpeace servvai easka máŋŋel. Sii eai álggahan miellačájehemiid, dadja son.
Son oaidná ovttaláganvuođa Amerihkáprosessas ja dat mii lea dáhpáhuvvan sápmelaččaide dáid máŋŋemus jagiid. Čearut sihke Ruoŧas ja Norggas leat šaddan guhkes riekteproseassaide suodjalit iezase rivttiid.
– Go miljárddat álget boahtit de lea váttis bissehit dan. Fovsenturbiinnat jorggistit ain, dadja son ja čujuha bieggamillopárkii Fovsenis, Norggas, gos leat leamaš stuora miellačájehaemit dáid máŋŋemus jagiid.