Digitálaspeallu Ándaras ja njoammelčivggat lea nu gohčoduvvon cuoiggo- ja deaddil speallu. Ándaras galgá gádjut njoammelčivggaid geat leat bieđganan miehtá speallomáilmmi.

Spealadettiin son deaivvada ollu meahcceelliiguin ja son sáhttá maiddái oaggut jogain ja mearas. Spealus ferte veahkehit meahcceelliid vai beassá viidáset.

Dárbu eanet sámi spealuide

Lea John Anders Sikku gii lea ráhkadan spealu, ja son oinnii dárbbu eanet sámi mánáidspealuide go ieš šattai áhččin.

Ulbmil spealuin lea ovddidit sámegiela somás vuogi mielde.

Preassadieđáhusas čállá ahte speallu lea buorre áigegollun seammás go ovddida mánáid lohkanattáldagaid. Speallu geavaha vearbaboaluid nugo ovdamearkka dihte ”geahča”, ”váldde” ja ”raba”.

Interaktiva dialoga

Spealus lea interaktiiva dialoga mii dagaha ahte spealli ferte geavahit muittu ja lohkama jus háliida ollet spealu lohppii. Lassin lohkanmáhtu nannemii, ovddida speallu muittu, čuolmmaid čoavdima ja kreatiiva jurddašeami.

Speallu lea ráhkaduvvon iOS ja Android geavaheddjiide ja gávdno justte dal beare davvisámegilii, muhto áigumuš lea jorgalit dan eará sámegielaide.

Prošeavtta lea Norgga Sámediggi ja Internašunála Sámi Filbmainstituhtta dorjon.