Njukčamánus 2014 mearridii Norgga eanandoallo- ja biebmodepartemeanta ahte Jovsset Ánte Sara ferte unnidit ealu 75 heggii.
Jovsset Ánte Sara gávnnahii ahte jos son dan dahkká de ii šat mana eallit boazodoalun ja son oaivvildii ahte dat rihkko oamastanrievtti mii gullo olmmošvuoigatvuhtii. Son váidalii mearradusa ja vuitii sihke diggegottis ja hoavvarievttis.
Muhto ášši manai alimus riektái ja juovlamánus 2017 bođii diehtu ahte Norgga stáhtta vuittii ášši ja Jovsset Ánte Sara dáhpehalai.
Rihkko olmmošvuoigatvuođa
Ášši sáddejuvvui ON:a olmmošvuoigatvuođakomiteai ja váide ahte stáhttá galggalii vuordit duomuin dassážii go ON:a komiteas boahtá cealkmuš.
Nu ii šaddan muhto čieža jagi maŋŋel lea olmmošvuoigatvuođakomitea cealkamus ahte alimus rievttis lei boasttut. Sii oaivvildit ahte lea olmmošvuoigatvuođarihkkon go Norgga stáhtta bágge sierra boazoeaiggádiid unnidit boazologu.
”Gávdnojit ákkat jáhkkit ahte eará boazodoallit maid leat velahuvvon go leat šaddan unnidit iežase ealuid. Duopmu mearkkaša ahte boazoealáhusláhka ferte rievdaduvvot”, čállá Sara advokáhtta, Trond Biti.
”Oba duođalaš”
Riikkabeaiváirras Lars Haltbrekken, Gurutbellodagas, dadjá ahte Norgga stáhtta ferte ruovttoluotta máksit Jovsset Ántii vai son ožžo njuolga boazologu.
–Norgga stáhtta lea fas rihkkon olmmošvuoigatvuođaid. Dat lea oba duođalaš. Mii vuordit dál ahte stáhtta fargga njulge dan boastuvuođa maid leat dahkan ja geahččá bearrái ahte velaheamit nohket, dadjá son.
Eanandoallo- ja biebmodepartemeanta muitala NRK Sápmái ahte galget árvvoštallat maid olmmošvuoigatvuođakomitea mearrádus mearkkaša.
”Mii galgat dál geahččat dán guorahallama cealkkaga ja makkár váikkuhusaid dát mielddisbuktá áššái”.