Sákkaldaga birra leat čállán dan rájes go šattai dovddus Documenta 14-čájálmasas duiskka Kasselis 2017:s.
Dan rájes dat lea čájehuvvon miehtá máilmmi ja lea maiddái leamaš vuođđun dokumentárafilbmii ”Historjá – stygn för Sápmi” mii vuittii Guldbaggen-bálkkašumi.
”Lea stuora gudni”
Marakatt Labba jotket rámidit. Dál čállá dáiddaaviisa ArtNews ahte sákkaldat lea okta dán jahkečuođi buoremus dáiddabuktagiin. Britta Marakatt Labba buvtta lea 34:at sajis sin listtus.
– Lea hirbmat stuora gudni, dadjá son SR Kulturnyttii.
Son joatká:
– Dát dáidda dagaha ahte máŋggas geat eai dieđe maidege sámi kultuvrra birra ožžot beroštumi ja háliidit diehtit eanet. Ulbmil lea ahte olbmot galget šaddat diehtoáŋgirat, háliidit diehtit eanet ja mon orun lihkostuvvan dainna.
Čájehuvvo dál Gironis
Listtus leat maid dálá áiggi stuorimus dáiddárat. Vuosttaš sajis listtus lea filbmadáiddára Arthur Jafa ”Love Is the Message, The Message Is Death” mii almmuhuvvui 2016:s. Su dáidda govvida rasismma ja sevdnjesvarat olbmuid dáistaleami dálá áiggi USA:s.
Juste dál čájehuvvo ”Historjá” Kin:as (Konstmuseum i norr) Gironis. Geasset dat čájehuvvo Moderna Muséetis Stockholmmas.