Mica Vesterlunde masterbargu lea dutkat geresiid ja son hálida diehtit ollu dain.
– Mii háliidit oaidnit jus leat erohusat geavaheamis, eatnandieđalaš erohusat ja kronologalaš erohusat, muitala Mica Vesterlund.
Unna muorrabinnážis lea ollu diehtu
Geresiid dutkagohtet vuđđolaččat sierralágán analiissaiguin. Unna muorrabinnážis ožžo ollu dieđu, makkar muoras lea dahkkon, mainna lea vuidon ja agi.
– Muorraiskosiid galget maid kol14 beaivádit vai ožžot dieđu man boarrásat geresat leat ja man áigodagas leat geavahuvvon, muitala Vesterlund.
Masterbargu lea oassi GLAS-prošeavttas – Jiehkkearkeologia Sámis, mas lea ulbmil iskat kulturárbbi mii ihtá go jiehkit ja jasat suddet Sámis.
– Mii leat gávdnan geresbázáhasaid go leat iskan jihkiid ja jasaid. Áigumus lea de dahkat čielggadusa vai ožžo eanet dieđu dain.
Dutkan váldo bures vuostá Ájttes
Sii leat easkaládje galledan Ájtte Johkamohkis geat bures vuostáiváldet dutkama go dát sáhttá addit mávssolaš dieđu sin čoakkálmassii.
– Mis leat sierralágán dieđut geresiin mat leat dáppe, muhto dieđut váilot ain. Mii illudit go dát dutkan lea jođus go dat addá midjiide eanet dieđuid , dadja Göran Sjöberg, Ájtte hoavda