Mánnodaga dieđihedje njeallje čearu – Ran, Sirgás, Unna Tjerusj ja Baste, ahte sii áigot stevdnet stáhta, Dálmma čearru lea maid ovdal dan dahkan.

Čearut oaivvildit ahte sis lea aktovuoigatvuohta hálddašit smávvafuođđobivddu ja guolasteami badjelis gilvinráji ja nu lea visot čearuin Lapplánddas.

Disdateahkeda dolle čearut oktasaš preassagávnnadeami Ruoŧa Sámiid Riikkasearvvin (RSR).

-Doaivu ahte Girjás-duopmu ođasmahttá lágaid mat guskket iežá čearuid lea jávkan ja gierdevašvuohta lea nohkan, dadjá advokáhtta Peter Danowsky, guhte ovddastii čearu Girjás-áššis.

”Dehálaš bargu”

Son čilge SVT Sápmái manin lea váldán dán barggu.

-Dat lea dehálaš bargu, dat lea sudjendihte unnitloguálbmoga, olmmošlas rivttiid ja dat lea miellagiddevaš juridihkalaš ášši. Mis ledjet visot dát alimus duopmostuolus ja dat mii boahtá lassin dál lea ahte dat politihkkálaš fámut eai leat čuvvon alimus duopmostuolu duomu, dalle min fertet mannát duopmostuoluid čađá fas no šaddá riekta.

Girjás-ášši válddii badjel logi jagi muhto son doivo ahte dát manná johtileapput.

-Mon doaivvun ahte šaddá oanehis proseassa ja ahte stáhttá mieđiha sártni danin go dáid njeallje čearuid dilli lea seammalágan go maid alimus duopmostuollu gávnnahii.

”Ii leat eará vejolašvuohta”

Mikael Kuhmunen, Sirgás čearu sátnejođiheaddji, oaivvilda ahte ii leat eará vejolašvuohta go ahte stevdnet stáhta.

-Go politihkka ii áiggo čuovvut lága, de min eat oainne iežá go ahte stevdnet stáhta, son dadjá ja muitala ahte ekonomálaš oassi ii leat válmmas.

-Dan ferte čoavdit maŋŋel, dál mis ii leat ruhtadeapmi guhkes prosessii muhto sávvat ahte nu ii šatta.

Silja Jonsson Marklund, stivraáirras Ran čearus, mearrádusa birra:

-Min leat vuordán politihkká muhto ii mihkege dáhpahuva Sámis dahje Ruoŧas ja dat lea dohkketmeahttumis dilli.

SVT Sápmi lea ohcan Justitiekánslera, guhte ii áiggo vel kommenteret ja báikegoddeministtara Peter Kullgren (KD).