Giellagálddu boahtteáigi lea leamaš eahpečielggas olles čavčča maŋŋel go diehtu bođii ahte ruoŧa ráđđehus ii šat áiggo ruhtadit Giellagálddu vihtta miljovnnain.
– Mon lean dieđusge movttet dasa ahte Sámediggi vuoruha sámegielaid ja oaidná árvvu barggus maid mii bargat, dadjá Mika Saijets, Giellagáldus.
”Fertet bargat garrasit boahtte jagi”
Boahtteáigi ii leat čovdojuvvon. Ruhtadeapmi lea boahtte jahkái muhto movt šaddá boahttevaš jagiide lea eahpečielggas, meidne Saijets.
– Vaikko mii leat bargan šaddat bistevaš organisašuvdnan de mii eat dieđe leago mis ruhtadeapmi sajis ja dainna fertet bargat garrasit boahtte jagi, son dadjá.
Logi proseantta olles kulturbušeahtas
Ruhtadeapmi Giellagáldui ferte váldojuvvot kulturlávdegotti bušeahtas. Stivraságadoalli Håkan Jonsson meidne ahte lea mearrádus maid lávdegoddi ferte váldit ja ii dievasčoahkkin.
Dat boahtá váikkuhit iežá kulturdoaimmaide. Jonssona jelgii dat mearkkaša sullii 2 miljovnna ruvnnu, mii muđui livčče mannan iežá doaimmaide. Dat vástida birrasii 10 proseantta olles kulturbušeahtas.
– Kulturlávdegotti bušeahta lea dal juo rašši ja dát mearkkaša ahte iežá doaimmat bohtet váikkuhuvvot, dađibahábut, dadjá Håkan Jonsson.