Socialdemokráhtat ožžo gait eanemus jienaid EU-válggas mannán sotnabeaivvi. Sii ožžo 24,8 proseanta ja Moderáhtat ožžo 17,6 ja šadde nuppát stuorimus bellodat.

Sosialdemokráhtain leat dál vihtta mandáhta Europaparlameantas ja okta guhte sávvá oažžut báikki lea Árjjepluovve gielddaráđđi Isak Utsi ja son lea gávccát namma bellodaga listtus.

Su ruoktogielddas ledje Socialdemokráhtat maid stuorimus, sii ožžo 38,3 proseanta jienain. Dat lea 5,5 proseanta eanet go maŋemus EU-válggain.

– Min leat ovdanan oba sakka ja dat lea hui somá. Dat dovdo dego mis lea stuora luohttámuš sihke Árjjepluovves ja leanas. Dat dovdo dego mii leat dahkán buori barggu, dadjá Utsi SVT Sápmái.

Ii ávvudan nu stuorrát

Vaikko manái nu bures de Utsi ii ávvudan nu stuorrát.

– Mon lean johtán olu dáid válggaid oktavuođas ja bisánan 40-50 báikái. Mon ávvudin dainná ahte ollet ruoktot Árjjepluovvai, velledit soffái ja geahččat tv.

Socialdemokráhttaid vuosttaš namát EU-listtus leat Heléne Fritzon, Johan Danielsson ja Evin Incir.

”Hui giitevaš”

Gaskavahkuiđida go sulli 1 800 dain 6 589 válggaguovllu ledje lohkkon de Utsi lei goalmmát sajis, loahpalaš bođus vurdojuvvo bearjadaga vai lávvordaga.

– Lea erenomáš ahte evttohasat cevzet EU-válggain. Muhto lea hui gelddolaš čuovvut lohkama ja oaidnit movt šaddá. Mon lean hui giitevaš juohke jiena ovddas ja dat mearkkaša issoras olu. Dat lea guite ahte dát válggat leat buktán bohtosiid.

Beroškeahtta jos son beassa parlameanttii vai ii de goit okta diŋga lea čielggas.

– Min áššit Sámis, Norrbottenis ja davvi Ruoŧas dárbbašit gullot eanet Brysselis.