Johkamohki ássit devde Norden biográfa disdat eahkeda. Sii ledje boahtan oasalasttit gulaskuddančoahkkimis masa Jokkmokk Iron Mines AB ja eamifitnodat Beowulf Mining leaigga gohčon.
– Čoahkkima ulbmil lei muitalit gos min leat dan proseassas ja maid mii áigut dahkat min biraslobi ohcamuša rámmas, dadjá Dmytro Siergieiev, prošeaktajođiheaddji Jokkmokk Iron Mines AB.
Johanna moaita vuođu
Johanna Lindberg orro Johkamohkis, son lei okta dain olbmuin geat orrot dan plánejuvvon guovllus. Son moaita gulaskuddančoahkkima vuođu:
– Vuođđu lei dego skuvlagirji, sii leat lohkan biraslága ja sii máhttet dan. Visot maid dadje lei ahte ”guorahallan lea jođus”, ii maidege sáhttán váldit duohtan ja ii masage sáhttán ovdanbuktit oaiviliid, son dadjá.
Danin vulge olbmot árabut
Guldaleaddjit moite maid laŋá ja ovdanbuktima vuođu. Olus atne ahte lei váttis oaidnit. Kártagovat filbmaliinnis ledje ilá unnit ja sihke čuovga ja jietna ožžo heajos árvosániid.
Muhtin oasalasttit geaiguin SVT humai guđđe čoahkkima go eai gullan mii dadjui laŋás.
Ruvkefitnodat vástida kritihkii
Filmmas gulat sihke Dmytro Siergieiev ja Beowulf Mininge beaivvalaš jođiheaddji Ed Bowie vástideami kritihkii.