”Muohtaniegut”-muitalus dáhpahuvva Sámis ja das leat olu osit sámi mytologiijas ja dološ oskus.

– In leat gávdnan maidege mii ii leat váldon min myhtain ja muitalusain, dadjá Elina Nygård, ossodathoavda Ájtte duottar- ja sámemuseas.

Máŋga ovdamearkat sámi mytologiijas

Juovlakaleandaris gávdnojit ovdamearkka dihte sáivo-álbmot, Tjelmetje-kristálla ja imašlaš jiehtanas meahcis mii muittuha klássihkalaš muitalusa Stálu birra.

Davvi Ruoŧas gávdnojit máŋga báikenamat main lea sáivo-sátni.

– Dalle ipmirda ahte lea juoga erenoamaš. Sáhttá leahkit sáivojávri mas leat guokte bottni ja daid vuolde lea Sáivu. Dat lea jávri gos ii galgga guolastit.

Lassánan beroštupmi čierastanluohkain

Ájtte musea Johkamohkis lea fas rabás maŋŋel juovlabasiid muhto oidnet jo lassánan beroštumi.

Máiddái čierastanbáiki Goabddális, gos stuora oassi juovlakaleandaris lea báddejuvvon, leat ožžon eambbo galledeaddjiid. Juovlalobis lassándedje stobuid láigun 15-20 proseanttain.

– Olu olbmot bohtet ja jearadit báddenbáikkiid birra. Ovdamearkka dihte Sáivo uvssa birra. Dat lea somá, dadjá Rebecca Gunnarstedt, Goabddálisa čierastanbáikkis.

Sáivu – paradiisa

Filmmas gulat Elina Nygårde muitaleame man garrasit diimmá juovlakaleandar lea čatnon sámi mytologiijai – ja noaidai ja Sáivui.