Dán jagi áigu Ruoŧa girku bidjat johtui sámi vuolggaheamiid earret eará herven, bierggasteami, girjjiid ja ovddidit čájáhusa.
Sámi ráđđi Ruoŧa girkus lea mearridan doarjut guhtta iešguđet vuostáiváldi 2025 ovddidit sámi girkoeallima. Tännäs-Ljusndals searvegoddi ožžo stuorimus oasi, 61 000 ruvnnu. Sin mielbargit galget oahppat eanet oarjansámegiela ja geavahit eanet oarjansámegiela girku doaimmahusain.
Iežá vuostáiváldit geat ožžot gaskal 15 000 ja 60 000 ruvnnu leat Föllinge gili searvegotti ráđđi, Gárasavvona Sámi bearašsearvi, Hïernesande bismaguovlu, Lunde bismaguovlu ja Lulli Jiemtie searvegoddi.
Ruoŧa girku bargá soabadeami ovddas
Geassemánus 2021 mearridii girkostivra ahte galget álmmolaččat ánuhit ándagassi sámi álbmogis historjjálaš vearrodaguid ovddas. Sámi girkoeallima ovddideapmi lea oassi soabadanproseassas ja okta dain Ruoŧa girku gávcci geatnegasvuođain. Dat lea vuolggasadji ja oppalaš mihttu sámi barggu ovddideamis girkus.
DOARJAGIID VUOSTÁIVÁLDIT
Sámi bearašsearvi Gárasavvonis ožžo 15 000 ruvnnu sámi sálmmaid lávluneahkedii Gárasavvonis 6 beaivvi guovvamánus.
Föllingegili searvegotti ráđđi ožžo 56 000 ruvnnu sámi čiŋádit Hotagena girku Jiemties.
Hïernesande bismaguovlu ožžo 25 000 ruvnnu álggahit sámi báikkalaš ossodaga Riikkaorgánisašuvnnas Ruoŧa Girku Nuorat.
Herjedaelie searvegoddi, Tännäs-Ljusnedals searvegoddi ožžo 61 000 ruvnnu čalmmustahttit sámi bargguid Tännäs-Ljusnedale searvegottis.
Lunde searvegoddi ožžo 20 000 ruvnnu nannet sámi girkoeallima Lunde searvegottis.
Lulli Jiemtie searvegoddi ožžo 30 000 ruvnnu vai besset joatkit ovddidit gávcci jahkodaga-čájáhusa mii lea Arodalena kapeallas Jiemties.