Boahtte čávčča álggahuvvo ámmátprográmma mas lea sámi sisdoallu ja oahppit besset bargohárjehallat sámi ealahusain. Sii besset válljet háliidit go bargohárjehallat boazodoalus, dáidagiin ja dujiin. Skuvla veahkeha dárbbu jelgii ohcat bargohárjehallanbáikki. Earret árbevirolašmáhtu ja biepmomáhtu dárjo oahpahus dábálaš joatkaskuvlagurssiid Ruoŧas.

Prográmmii eai lean ohccit

Johkamohkis lea juo ovdalaččat sámi servvodatprográmma, muhto dasa eai lean ohccit diibma čakčat. Dat dagahii ahte skuvla háledii hutkat juoida iežá.

-Dát dovdo hui bures, sii besset váldit vuodjengoartta, skotervuodjinduođastusa ja bivdoeksamena, muitala Jan-Erik Kuoljok, sámiprográmma rávvejeaddj ja som lea maid okta dain ovddasvástideddjiin ođđá sámi ámmátprográmmas.

Várra šaddat gilvaleapmi prográmmaid gaskkas

Skuvlla jelgii lea várra ahte dát guokte prográmma geasuhit seamma oahppiid ohcat, muhto dan gal ferte áigi čájehit. Dát prográmmat leat guokte prográmma mat dievasmahttiba goabbatguoimmi.

-Mu mielas lea hui somá ja oahpahusas lea ollu sámivuohta, boazodoallu, giella ja duodji. Mon boađán Västerbottenis ja lean okto farren deike, muitala Sanne-Máret guhte váccá vuosttaš jagi sámi servvodatprográmmas.

-Mii oahppat ollu sámi kultuvrras ja árbbis. lea deaŧalaš nánnet identitehta, dadja Ella-Karin Nårsa guhte maid váccá vuosttaš jagi sámi servodatprográmmas.