Earret iežá Gapná čearru ja Luoddugáhttensearvi leaba váidalan ruvkefitnodaga plánaid viiddidit sin doaibmaga Bájilis.
Njeallje beaivvi meannudedje dan ášši Bajit eanan- ja birasduopmustuolus. Go SVT Sápmi jearuhii Lars-Marcus Kuhmunena moadde beaivvi maŋŋel de sus lei buorre doivva.
– Mus lea buorre doivva ahte dát ii ollašuvvo go dat lea nu eahpegovttolaš, son dadjá.
”Olu bohccot leat vuojahallan”
Málmafievrredeapmi bukta váttisvuođaid boazodoallui. Čearru ii leat sáhttán geavttit sin guohtuneatnamiid go leat fievrredan málmma luottaid mielde.
– Dát luottat gos fievrredit mannet ristut rastut miehta Gapná dálveguohtuneatnmaiid, dadjá Kuhmunen.
Son joatka:
– Daid jagiid go leat fievrredan de min eat leat sáhttán geavttit min dálveguohtuneatnamiid. Min geahččaleimme moddii johtit dohko muhto doppe vuojahallo bohccot.
Oaivvildehpetgo ahte din lehpet massán dáid eatnamiid?
– Juo, dan min oaivvildit. Fievrredeapmi dahkká ahte eat sáhte guođohit bohccuid dain eatnamiin.
Otne fievrriduvvo málma ruvkkis ruovderaŧis. Muhto čearru oaidna iežá vejolaš geainnu. Jos dolvot málmma suoma ruovderaŧŧai, guhtta kilomehtara nuppi guvlui, de dat livččii geahpidit olu čearu ovddas, son oaivvilda.
Ruvkefitnodat: ”Mearrideaddji ahte oažžut lobi”
Kaunis Iron oaivvilda ahte lea mearrideaddji sinsiidda ahte duopmustuollu addá lobi. Ruvkefitnodat dadjá ahte dálá ruvki nohkka juo 2027 ja dalle sii fertejit heaittihit doaibmaga dan guovllus.
– Lea mearrideaddji guhkesáigasaš doibmii Bájilis ja dan viiddiduvvon ruvkedoibmii Sahaváris ahte oažžut lobi, muitala Hans Djurberg, bisttevašvuođa hoavda, Kaunis Iron, P4 Norrbottenii.
Son joatka:
– Mađi árabut mii oažžut dan duomu dađi buorebut.
Duopmustuollu mearradus galgá boahtit guovvamánu 7 beaivvi 2025.