Nu got SVT Sápmi ovdal lea muitalan evttuha Ruoŧa ráđđehus bušeahtaproposišuvnnas ahte ruhta Sámedikki giellaguovddážii unno viđain miljuvnnain. Sámediggi ráhkkana dal ođđasit organiseret gielladoaimma.
– Mis han lea leamašan bistevaš ruhtadeapmi 14 jagi juo, guhtta miljuvnna, ja mii han mannat ruoktut dasá, dat ii leat dat ovdalaš giellaguovddáš mii dal hábmejuvvo. Giellaguovddáš galgá gávdnot miehtá Sámi ja ovdal dat lea leamaš oarjánsámegielguovllus nu ahte dát gávcci bargi geat báhcet giellaguovddážii, sii galget gávdnot juohke báikkálaš kantuvrras, dadjá Anita Kitok.
Bargoaddi ja fágasearvvit leat soabadan
Bargoaddi ja fágasearvvit Sámedikkis leat soabadan ahte Gironis heaittihuvvojit golbma prošeaktajođiheaddjivirggi, okta Johkamohkis ja bealleáigasaš virgi bargojođiheaddjin sihke Deartnas ja Staares, go daidda ii leat šat dárbu go bargoveahka unno.
Got don jáhkát dat boahtá váikkuhit giellabarggu Sámedikkis?
– Mon jáhkán ahte dat váikkuha oalle olu, mii eat baste dasá maidege danin go doaibma ráhkaduvvo budjeahta vuođul. Dat lea guhtta miljuvnna mii lea bistevaš ruhtadeapmi, dadjá Anita Kitok.
Juohkit ruđa ISOF:an
Budjeahttaproposišuvnnas evttoha ráđđehus nai ahte Sámediggi ja Giella- ja álbmotmuito-instituhtta, ISOF, besset juohkit gávcci ja bealle miljuvnna muhto got dat dahkko, ii leat makkárge diehtu vel. Loahpalaš mearrádus budjeahtas váldá ruoŧa riikkabeaivi juovlamánus.
– Mii dieđusge sávvat ahte go budjeahttaproposišuvdna lea leamaš gulaskuddamis, ahte dat šaddet rievdadusat, loahpaha Anita Kitok.