Ameriihkka válggat lahkonišgohtet muhto soahpameahttunvohta lea stuoris. Válggat leat skábmamánu 5 beaivvi ja álbmotoaivil lea dássidis. Donald Trumpe leat viggan goddit guktii ja dat lea váikkuhan válggaid.
Iige álgoálbmogiid gaskan lea diehttelas goappá evttohačča oidet.
– Mun dajášin ahte álgoálbmotjienasteaddjit dávjá leat demokráhtat ja eambbo liberalat miehta riikkas. Muhto muhtin stáhtain lea earálágan dilli, dego Oklahomas. Doppe leat eambbo konservatiivvat. Alaskas leat maid olu jienasteaddjit geat dorjot Trumpe, muitala Pauly Denetclaw SVT Sápmái.
Álgoálbmot evttohaččat
Son lea politihkalaš reporttár Indian Country Today:as (ICT) ja son čuvvo sihke presideanta válggaid muhto maiddái sierra stáhta válggaid ja álgoálbmot evttohaččaid kongressii.
Dán jagaš válggaide geahččalit njeallje álgoálbmot evttohaččat váljjejuvvot ođđasit. Earret eará Tom Cole guhte lea dat álgoálbmot ovddasteaddji gii lea čohkadan guhkimusat ameriikka kongreassas. Dat golbma eará leat Josh Burkeen, Sharisa Davids ja Mary Peltola.
– Lea beroštahtti go lea sáhka álgoálbmot áššiid birra dáppe USA:s. Sii geat beroštit eanemus álgoálbmot áššiin kongreassas leat dávja republikánat geat čalmmustahttet daid hástalusaid mat álbgoálbmot nášuvnnain leat.
Denetclaw muitala ahte oppalaččát dat leat seamma áššit mat leat beroštathtti sihke álgoálbmot jienasteaddjiide go eará jienasteaddjiide USA:s. Sii háliidit buoribut interneahta, luottaid ja elfámu, son dadjá.
