Mánnodaga bissehii Meahccestivra gaskaboddosaččat SCA čuollamiid mehcciin davvelis Backena Vängelåsenis maŋŋel go Greenpeaceaktivisttat ja Skogsupproret dieđihan ahte mehciin leat alla luondduárvvut.
Poliissat leat leamaš doppe álggu rájis vai sáhtet čađahit čuollamiid, muhto maŋŋel Meahccestivrra mearradusa de sii šadde fas bissehit daid.
Meahccestivra: Luondduárvvut guorahallojuvvojit
SCA sáddii sisa njeaidinilmmohusa juovlamánus, muhto easka mannán bearjadaga fuobmai Greenpeace meahci luondduárvvuid maid Meahccestivra árvvoštalla gáibida eanet guorahallama.
-Doppe lea earenomáš čáihni ja dan dihte mii háliidit guorahallat luondduárvvuid eanet. Doppe soitet maid leat eará slájat mat leat rukseslisttus dahje ráfáiduhtton, dadjá Linnea Edwang Stridbo Meahccestivrras.
Oassi meahcis dan čuollanilmmohuvvon guovllus lea áin ceaggut. Karolina Carlsson Greenpeacas oaivvilda ahte leat birásorganisašuvnnat geat leat dieđihan daid luondduárvvuid Meahccestivri ja dat čájeha ahte eiseválddit ja meahccefitnofdagat eai váldde ovddasvástádusa.
-Dát čájeha ahte mis lea rimso vuogádat, dadjá son.
Okta máŋga Greenpeaceakšuvnnain
Greenpeace lea čađahan máŋga akšuvnnaid bissehan dihte meahccefitnodaga SCA čuollamiid Jämtlandda ja Västenorrlandda leanas.
Leat guovllut maid meahccefitnodat oamasta, muhto leat guohtuneatnamat mat gullojit Ohredahke čerrui. Sis leai ovdal mieđihanšiehtadus, muhto dat lea dál boatkanan maŋŋel go čearru oaivvildii ahte meahccefitodat badjelgeahčai sin.
SCA:s ferte dál buktit dievasmahttin dieđu dán bissehuvvon čuollanguovllu luondduárvvvuin ovdal čakčamánu 1.beaivvi.