Mannan vahku lohpidii biilagilvvu event director Erik Åström ahte vuodjinmátki man namma lea Umeå Lång vqldo eret. Dan vuodjinmátkkis ledje olu bohccot lahkosis muhto sotnabeaivvi vudje goitge doppe, muhto ledje oanidan vuodjinmátki vehá. Ran čearru atná ahte lágideaddji galggašii heahpanit ja Erik Åström dovddastii ahte son válljii duolbmut čearu dán áššis.
”Eat dovdan gáibadusaid”
Mánnodaga ánuhii beaivválaš jođiheaddji ándagassii.
– Min eat dovdan gáibádusaid ovttage doarjaleaddjin dehe lágideaddjis FIA:s. Lei gilvvu ráđđi, mon ja Erik, geat válddiime oktasaš mearrádusa. Moai ánuhetne ándagassii jos dovdet ahte eai leat ožžon njuolga dieđuid, dadjá Anna Nordkvist.
Álggus ohce lobi leanastivrras doallat MM-ralli muhto ohcamuš váidaluvvui Fievrridanstivrii, dat proseassa lea ožžon olu moaitámušaid. Leanastivrra mearrádus bođii maŋŋit ja čearu váidalus ii leat vel mearriduvvon – vaikko ralli lea nohkan.
Árabut gulahallan
Dál oaivvilda Anna Nordkvist ahte proseassa ferte rievdat boahtte jahkái. Ášši manná dalle eatnanhearrá Helene Hellmarke lusa.
– Lean ieš deaivan eatnanhearrá máŋgii dán vahku, mii galgat álggahit gulahallama olu árabut. Son áigu doallat čoahkkima leanastivrran ja čearuiguin.
Leanastivrra gulahallanhoavda, Jörgen Boman, duođašta ahte Helene Hellmark lea váldán dán mearrádusa.
– Guoskevaččat galget ipmirdit guhtet guimmiideaset rollaid ja baikkalaš geahččanguovllu dán áššis. Sii galget ságastallat lagamuš áiggi, njukčamánus dahje cuoŋománus, go vásáhusat leat ain varas muittus, dadjá Jörgen Boman.