Juohke sámedikkiválggain leat sulli 60 proseanta jienasteaddjiin jienastan ja jienastuslogus leat vádjit 10 000 olbmo. Dat leat unnán go Sámediggi árvvoštalla ahte ruoŧabealde leat 20 000-40 000 sápmelačča.
Háliida bissehit váidimiid
Sámedikki stivra oaivvilda ahte čilgehus dasa lea ahte dál sáhttá váidit jienastuslogu. Son gii ii leat jur vissis lea go sápmelaš ii soaitte duostat ohcat jienastuslohkui vai beassá jienastit.
Danin evttuha stivra dán vahku dievasčoahkkimis ahte dás ovddosguvlui ii galgga šat sáhttit váidit ja ahte ii leat šat almmolaš. Dása lea opposišuvdna vuosttá. Jienastuslohku lea dagahan digáštallamiid sihke Ruoŧas, Suomas ja Norggas.
Opposišuvdna moaitá
Maŋŋemus áiggiid lea earret eará NRK Sámi journalistalaš guorahallan čájehan ahte oallugat jienastuslogus norgga bealde eai deavdde eavttuid. Áššedovdit leat várren ahte Sámediggi sáhttá fámohuvvat jus olbmot geain ii leat kultuvrralaš gullevašvuohta sáhttet váikkuhit áššiin maid sápmelaččaid alimus orgána mearrida.
-Mii gal áigut vuostálastit ahte áigot váldit eret váidinvejolašvuođa olbmuid geat leat ohcan jienastuslohkui. Lea ášši maid ferte guorahallat. Lea deaŧálaš ášši dán čoahkkimis, dajdá Lars Miguel Utsi, Guovssonásti.
Stivra oaivvilda ahte jienastusloguváidaleamit mat leat dahkkon ruoŧabeal Sámis eai leat buktán makkarge bohtosiid. Váidon olbmot eai leat sihkkojuvvon eret jienatuslogus. Stivrra jelgii sáhttá luohttit ahte ovddit válgalávdegottit leat bargan buori barggu ja ahte ii oktage guhte ii deavdde eavttuid leat mielde.
Dát ášši lea dieđusge okta dain maŋŋemus čuoggáin dievasčoahkkimis Sjätavaellies.