Unna Tjerusj lea okta dain njeallje čearuin geat stevnejedje stáhta missemánu loahpageažis. Dat earat leat Ran, Sirges ja Baste.
Sii oaivvildit ahte sis lea aktonasriekti hálddahit bivdu- ja guolásteami badjelis gilvinráji ja sii čujuhit dan nu gohčoduvvon Girjasduomu.
Mánnodaga válljii stáhtta váidalit čearuid stevdnemusaid. Muhto sii gáibidit eanet áiggi no sáhttet guorahallat doloža rájes geavaheami.
Danin lea stáhtta sihtán dutkiid Luleju teknihkalaš universiteahtas, LTU, bargat guorahallamin. Sii sihtet vuordit njeallje mánu dan lohpalaš cealkámusa.
– Mon in jáhkkán ahte sii galget dasá golahit ruđaid ja áiggi go dilli lea nu čielggas min guovllus. Dat lei vuordetmeahttun, dadjá Helena Omma, Unna Tjerutja ságadoalli.
”Guorahallan lea juo dahkkon”
Son oaivvilda ahte eai dábbaš ođđa guorahallama.
– Min mielan eanangeavaheami guorahallan lea juo dahkkon Girjasduomu oktavuođas. Das bohtá ovdan juste makkár eanangeavaheapmi lea leamašan. Mon in dieđe maid vel sii galget buktit.
Čearru áigo cealkit dan ahte stáhtta lea gáibidan eanet áiggi.
– Min ádvokáhtat atnet ahte njeallje mánu lea oba guhkes áigi dievasmahttit váidalusa.
Tálmmá čearru lea maid stevnen stáhta ja máiddái dan áššis leat sihtan veahki LTU:as. Tálmá lea gáibidan maŋideami iežaset cealkámuššii, muhto diggegoddi ii leat vel meannudan ohcámuša.
