Börje Salming skihppái ALS dávdii ja vádjolii skábmamánu 24 beaivvi 2022. Son lei okta Ruoŧa stuorimus jiekŋahockeyspelliin.

Dan rájes leat máŋga dokumentarat, filmmat ja tv-ráiddut ráhkaduvvon Börje ja su viellja Stig Salminge birra. Diibma almmuhuvvui earret ieža dokumentara ”Salming – samerna från Salmi” SVT:as gos soai hupmaba sunno sámi duogáža birra.

Dál lea Stig áigeguovdil ođđa girjjiin, ”Berättelsen om bröderna Salming”, maid Stig lea čállan journalistain Ulf Kriströmen ja dat almmuhuvvui Girjemeassus moadde vahku áigi.

Signerii girjji Gironis

Girji muitala vielljačagaid oktasaš duogaža, bajasgeassima, Brynäs karriera ja oktavuođa birra. Dat geahččala maid čalmmustahttit Stige mearkkašumi ruoŧa jiekŋahockeyi.

– Ulf anii ahte gávdno muitalus munno viellja birra go moai čuovuime guvtteguimmiid olles mátki dassážii go Börje sirddii Kanádai. Son anii ahte dan muitalusa gánnaha muitalit, mon dovden de ahte okej, moai geahččaletne dahkat dan, dadjá Stig Salming.

Distaga son lei Gironis signereme ođđa girjji.

– Dat dovdui hui bures, mon illudan deaivvadit Gironlaččaiguin. Mon sáván ahte olbmot atnet ahte lea miellagiddevaš váldit oasi munno muitalusas, son dajái ovdal girjesignerema.

”Dieđusge lea váivi”

Son mieđiha ahte ii leat áibbas álki leamašan čállit dan girjji ja muittašit olles eallima.

– Dieđusge lea váivi ahte dát muitalus nogai go Börje vádjolii. Muhto dál lea áigi gollan ja mon lean beroštuvvan ALS-vuođđudussii mii álggahuvvui Börje nammii.

Börje Salminge ALS-vuođđudus álggahuvvui maŋŋel go Börje jámii ja Stig Salming doivo ahte girji sáhttá mielddisbuktit ahte olbmot beroštisgohtet dan vuođđudussii ja dávdii.

– Mon dovddan ahte dát girji sáhttá leahkit ávkin ALS-vuođđudussii ja ahte mii sáhttit muitalit dan dávdda birra, ja mađi eanet mii sáhttit muitalit dan birra dađi eanet ruđa vuođđudus sáhtta oažžut, son dadjá.